काठमाडौं, साउन २० — नेपाल वन प्राविधिक सङ्घले “स्मार्ट वन व्यवस्थापनका लागि डिजिटल उपकरण: नेपालमा सफ्टवेयर नवप्रवर्तनमार्फत वन व्यवस्थापनसम्बन्धी निर्णय प्रक्रियालाई प्रभावकारी बनाउने” विषयमा प्राविधिक प्रस्तुति कार्यक्रम सम्पन्न गरेको छ। कार्यक्रम बुधबार बबरमहलस्थित सङ्घको सभाहलमा सम्पन्न भएको हो।
कार्यक्रममा वन नेपाल (Forest Nepal) का संस्थापक तथा हाल फिनल्यान्डमा कार्यरत डा. हरि अधिकारीले डिजिटल प्रविधि तथा सफ्टवेयर नवप्रवर्तनको प्रयोगमार्फत वन व्यवस्थापनलाई थप प्रभावकारी, पारदर्शी र वैज्ञानिक बनाउन सकिने विषयमा विस्तृत प्रस्तुति दिएका थिए। उनले वन व्यवस्थापन कार्ययोजना तयार गर्ने प्रक्रिया, वन व्यवस्थापनसम्बन्धी प्राविधिक निर्णय तथा प्रमाणमा आधारित वन शासन प्रणालीलाई डिजिटल प्रविधिले थप सुदृढ बनाउन सक्ने सम्भावनाबारे प्रकाश पारे।
कार्यक्रमको सहजीकरण गोविन्दप्रसाद दाहालले गरेका थिए भने नेपाल वन प्राविधिक सङ्घको सचिवालयको समन्वयमा कार्यक्रम आयोजना गरिएको थियो। विशेषगरी सामुदायिक वन क्षेत्रमा कार्यरत वन प्राविधिकहरूका लागि वन व्यवस्थापन योजना निर्माण तथा प्रभावकारी निर्णय प्रक्रियामा डिजिटल उपकरणको उपयोगबारे कार्यक्रम उपयोगी हुने आयोजकले जनाएको छ।
प्रस्तुतिपछि सहभागीहरूबीच अन्तरक्रियात्मक छलफलसमेत भएको थियो। छलफलमा डिजिटल रूपान्तरणले दिगो वन व्यवस्थापन, जैविक विविधता संरक्षण तथा जलवायु उत्थानशीलता अभिवृद्धिमा पुर्याउन सक्ने योगदानबारे अनुभव र धारणा आदानप्रदान गरिएको थियो। साथै, नयाँ प्रविधि र नवीन व्यवस्थापन पद्धतिसँग अनुकूल हुन वन प्राविधिकहरूको प्राविधिक क्षमता अभिवृद्धि आवश्यक रहेकोमा जोड दिइएको थियो।
कार्यक्रमको समापन गर्दै आयोजकले यस्ता ज्ञान आदानप्रदानका कार्यक्रमले अन्तर्राष्ट्रिय अनुभव र नेपालको वन व्यवस्थापन अभ्यासबीच सेतु निर्माण गर्दै सरकारी तथा सामुदायिक वन व्यवस्थापनमा स्मार्ट प्रविधिको प्रयोग विस्तार गर्न महत्त्वपूर्ण योगदान पुग्ने विश्वास व्यक्त गरेको छ।
सङ्घका अनुसार यस कार्यक्रमले नेपालको वन क्षेत्रमा प्रविधि, नवप्रवर्तन र वैज्ञानिक निर्णय प्रक्रियाप्रति बढ्दो चासोलाई प्रतिबिम्बित गरेको छ, जसले देशका वन स्रोतको दीर्घकालीन दिगो संरक्षण तथा व्यवस्थापनमा सकारात्मक योगदान पुर्याउने अपेक्षा गरिएको छ।