काठमाडौँ । विश्व शिक्षक महासंघले नेपाली शिक्षकहरूको आन्दोलनप्रति ऐक्यबद्धता जनाउँदै शुभकामना व्यक्त गरेको छ । आज एक सूचना निकाल्दै विश्व शिक्षक महासंघ एफआईएसईले शिक्षा आन्दोलनको अग्रपंक्तिमा उभिएर गुणस्तरीय, समतामूलक र सबैका लागि पहुँचयोग्य शिक्षाको वकालत गर्ने नेपाल शिक्षक महासंघ र सबै नेपाली शिक्षकहरूको निरन्तर प्रयासको कदर गर्ने जनाएको छ ।
साथै नेपाली शिक्षकहरूको पेसागत सम्मान, राम्रो कामको अवस्था र शिक्षालाई सामाजिक न्यायको माध्यमका रूपमा रूपान्तरणका लागि भएको संघर्षमा आफ्नो अन्तर्राष्ट्रिय आन्दोलनको लक्ष्यसँग पूर्ण रूपमा मेल खाने उक्त ऐक्यबद्धतामा उल्लेख छ ।
राजनीतिक, आर्थिक र भौगोलिक चुनौतीहरू बाबजुद पनि शैक्षिक सुधार र संघको सक्रियताप्रति नेपाली शिक्षकहरूले गरेको अटल प्रतिबद्धताले समतामूलक र जनकेन्द्रित शिक्षा प्रणालीको फराकिलो सङ्घर्षमा महत्त्वपूर्ण योगदान पुर्याएको पनि जनाइएको छ ।
