रुकुम । रुकुम पूर्वको भूमे गाउँपालिका–९ चुनबाङस्थित दोमै खोलाको भत्किएको पुल देखाउँदै १५ वर्षीया सदीक्षा ओलीले पूर्वप्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई सम्बोधन गर्दै बनाएको भिडियो सामाजिक सञ्जालमा चर्चित बनेको छ ।
‘हेलो ! प्रचण्ड बाजे, कता हुनुहुन्छ ? हाम्रो यहाँ पूर्व रुकुमबाट चुनाव जितेर मात्रै जानुभो, यहाँ पुलको हाल हेर्नुस् यस्तो छ । भाँच्चिएर हामी खोलाबाट तरेर जानुपर्छ । गाईबाछालाई बगाउन सक्छ, हामी मान्छेलाई पनि बगाउन सक्छ । बच्चाहरू यहाँबाट स्कुल आवतजावतसमेत गर्छन् । तिनीहरूलाई पनि बगाउन सक्छ । त्यही भएर यहाँ पुल बनाइदिनुपर्यो,’ उनले भिडियोमा भनेकी छन् ।
आइतबार साँझ करिब ८ बजे फेसबुकमा पोस्ट गरिएको भिडियो भाइरल बनेको छ। भिडियोमा प्रतिक्रिया र कमेन्ट गर्नेहरूको संख्या नि निकै धेरै छ ।
सदीक्षाले आफ्नो गाउँनजिकै रहेको दोमै खोलाको पुल दुई महिनाअघि भत्किए पनि अहिलेसम्म मर्मत हुन नसकेको भन्दै समस्या समाधानका लागि सम्बन्धित निकायको ध्यानाकर्षण गराउन भिडियो बनाएकी छन् ।
भूमे गाउँपालिका–९ की १५ वर्षकी उनी गाउँबाट करिब एक घण्टाको दूरीमा रहेको गैरीगाउँस्थित नेपाल राष्ट्रिय माध्यमिक विद्यालयमा कक्षा १० मा अध्ययनरत छन् ।
विशेषगरी बर्खाको समयमा खोलामा पानीको बहाव बढ्दा जोखिम थपिने गरेको र यही बाटोबाट विद्यालय जाने बालबालिकासमेत आवतजावत गर्ने भएकाले कुनै अप्रिय घटना हुनुअघि नै पुल निर्माण वा मर्मत गर्नुपर्ने उनको माग छ ।
उनको यो भिडियोले स्थानीय समस्यालाई राष्ट्रिय बहसमा ल्याइदिएको र निर्वाचन जितेपछि आफ्नो क्षेत्रमा कम आउने नेताहरूलाई दबाब दिएको उनका प्रशंसकहरूले बताएका छन् । १५ वर्षीया किशोरीले सामाजिक सञ्जालमार्फत उठाएको पुलको विषयले सम्बन्धित निकायलाई तत्काल ध्यान दिनुपर्ने दबाबसमेत सिर्जना गरेको छ ।