काठमाडौं । स्पार्क हाइड्रोइलेक्ट्रिक कम्पनी लिमिटेडको २६औँ वार्षिक साधारणसभा काठमाडौंमा सम्पन्न भएको छ। सभाले कम्पनीको वित्तीय, संस्थागत तथा भावी रणनीतिसम्बन्धी विभिन्न महत्वपूर्ण प्रस्तावहरू पारित गरेको छ।
साधारणसभाले आर्थिक वर्ष २०८१/८२ को वित्तीय विवरण अनुमोदन गर्दै कम्पनीले जलविद्युत् क्षेत्रमा हासिल गरेको प्रगति तथा कार्यसम्पादनको समीक्षा गरेको थियो। साथै कम्पनीको वित्तीय लेखापरीक्षणका लागि लेखापरीक्षक नियुक्त गर्ने प्रस्ताव पनि स्वीकृत गरिएको छ।
सभाको अर्को महत्वपूर्ण एजेण्डाअन्तर्गत सञ्चालक समितिको निर्वाचन सम्पन्न गरिएको छ। यससँगै आगामी कार्यकालका लागि कम्पनीको नेतृत्व संरचना थप सुदृढ भएको विश्वास गरिएको छ।
शेयर व्यवस्थापन तथा पूँजी परिचालनसँग सम्बन्धित विभिन्न सम्झौता तथा निर्णयहरूलाई पनि सभाले अनुमोदन गरेको छ। कम्पनीका भावी लगानी योजना तथा विस्तार रणनीतिलाई प्रभावकारी रूपमा कार्यान्वयन गर्न जारी पूँजीबापत शेयरधनीहरूबाट रकम माग गर्ने अधिकार प्रदान गरिएको छ।
त्यसैगरी नयाँ लगानीकर्तालाई शेयर बिक्रीसम्बन्धी व्यवस्था अनुमोदन गरिएको छ, जसबाट कम्पनीमा थप लगानी आकर्षित हुने तथा वित्तीय क्षमता अभिवृद्धि हुने अपेक्षा गरिएको छ।
सभाले पारित गरेका प्रस्ताव कार्यान्वयन गर्न आवश्यक निर्णय तथा प्रक्रिया अगाडि बढाउने अधिकार सञ्चालक समितिलाई प्रदान गरेको छ।
कम्पनीका अनुसार साधारणसभाबाट पारित निर्णयहरूले संस्थागत सुदृढीकरण, सुशासन प्रवर्द्धन तथा दिगो ऊर्जा विकासमा कम्पनीको योगदानलाई थप प्रभावकारी बनाउनेछन्। नेपालले स्वच्छ ऊर्जा उत्पादन र ऊर्जा सुरक्षालाई प्राथमिकता दिइरहेको वर्तमान अवस्थामा यस्ता निर्णयहरूले जलविद्युत् क्षेत्रको दीर्घकालीन विकासमा सकारात्मक योगदान पुर्याउने विश्वास गरिएको छ।