काठमाडौं । नेपाल रिकन्डिसन अटो व्यवसायी संघ (NERABS) को आयोजनामा विजयादशमी, शुभ दीपावली २०८३, नेपाल संवत् ११४७ तथा छठ पर्वको अवसरमा शुभकामना आदानप्रदान तथा चियापान कार्यक्रम सम्पन्न भएको छ।
असोज २४ गते काठमाडौंमा आयोजित कार्यक्रममा संघका केन्द्रीय पदाधिकारी, रिकन्डिसन अटो व्यवसायी, संघका सदस्य तथा विभिन्न क्षेत्रका व्यवसायीहरूको उल्लेख्य सहभागिता रहेको थियो। कार्यक्रममा सहभागीहरूले नेपालीहरूको महान् चाडपर्वको शुभकामना आदानप्रदान गर्दै आपसी सद्भाव, सहकार्य र व्यावसायिक एकतालाई थप मजबुत बनाउने प्रतिबद्धता व्यक्त गरेका थिए।
कार्यक्रममा बोल्ने वक्ताहरूले नेपालको रिकन्डिसन अटो व्यवसायले सामना गरिरहेका समसामयिक चुनौती, व्यवसायीहरूको हकहित संरक्षण तथा यस क्षेत्रको व्यवस्थित विकासका विषयमा धारणा राखेका थिए। व्यवसायमैत्री वातावरण निर्माण, व्यवसायीबीच सहकार्य विस्तार र साझा समस्याको समाधानका लागि संघले प्रभावकारी भूमिका निर्वाह गर्नुपर्नेमा समेत जोड दिइएको थियो।
संघले ‘एकतामा शक्ति, सदस्यहरूको समृद्धि’ भन्ने मूल नारालाई आत्मसात् गर्दै व्यवसायीहरूबीच आपसी विश्वास, एकता र सहकार्य अभिवृद्धि गर्ने लक्ष्य राखेको छ। चाडपर्वको अवसरमा आयोजना गरिएको यस कार्यक्रमले संघका सदस्यहरूबीच सम्बन्ध सुदृढ बनाउनुका साथै व्यावसायिक हकहितका विषयमा साझा धारणा निर्माण गर्न सहयोग पुर्याउने अपेक्षा गरिएको छ।
कार्यक्रमको अन्त्यमा उपस्थित पदाधिकारी, व्यवसायी तथा अतिथिहरूले एकअर्कालाई विजयादशमी, दीपावली, नेपाल संवत् तथा छठ पर्वको शुभकामना व्यक्त गरेका थिए। चियापान तथा आपसी भेटघाटसँगै कार्यक्रम सम्पन्न भएको संघले जनाएको छ।
