काठमाडौं — नेपालमा डिजिटल शिक्षाको विस्तार तथा प्रविधिमैत्री शिक्षण प्रणालीको विकास गर्ने उद्देश्यसहित आयोजित ‘डिजी एजुX ३.०’ तथा ‘डिजी अवार्ड समारोह २०८२’ भव्य रूपमा सम्पन्न भएको छ। कार्यक्रममा देशभरका शिक्षक, विद्यार्थी, शैक्षिक संस्थाका प्रतिनिधि तथा प्रविधि क्षेत्रमा आबद्ध व्यक्तित्वहरूको उल्लेखनीय उपस्थिति रहेको थियो।
उक्त कार्यक्रममार्फत डिजिटल शिक्षण विधिलाई प्रभावकारी बनाउने, शिक्षकहरूको क्षमता अभिवृद्धि गर्ने तथा विद्यार्थीहरूलाई आधुनिक प्रविधिसँग अभ्यस्त गराउने लक्ष्य राखिएको आयोजकले जनाएको छ।
‘डिजी एजुX ३.०’ अन्तर्गत शिक्षकहरूका लागि विशेष प्रशिक्षण, अनुभव आदान–प्रदान तथा अन्तरक्रियात्मक सत्रहरू सञ्चालन गरिएका थिए, जसले सहभागीहरूलाई नयाँ शिक्षण शैली र प्रविधिको प्रयोगबारे व्यावहारिक ज्ञान प्रदान गरेको थियो।
कार्यक्रमकै प्रमुख आकर्षणका रूपमा रहेको ‘डिजी अवार्ड समारोह २०८२’ मा उत्कृष्ट प्रदर्शन गर्ने विद्यार्थी तथा सहभागीहरूलाई सम्मान तथा पुरस्कार वितरण गरिएको थियो। डिजिटल सीप, कम्प्युटिङ क्षमता तथा नवप्रवर्तनमा उत्कृष्टता हासिल गर्ने विद्यार्थीहरूलाई प्रोत्साहन गर्ने उद्देश्यले यस्तो कार्यक्रम आयोजना गरिएको आयोजक पक्षले जानकारी दिएको छ।
समारोहमा डिजिटल इनोभेसन, प्रविधिमा आधारित शिक्षण प्रणाली, भविष्यका शैक्षिक चुनौती तथा अवसरहरूबारे समेत विस्तृत छलफल गरिएको थियो। सहभागीहरूले यस्ता कार्यक्रमहरूले नेपालमा गुणस्तरीय डिजिटल शिक्षाको विकासमा टेवा पुर्याउने विश्वास व्यक्त गरेका थिए।
कार्यक्रमस्थलमा विभिन्न शैक्षिक सामग्री, प्रविधिसम्बन्धी प्रदर्शनी, सूचना आदान–प्रदान तथा सहभागितामूलक गतिविधिहरू समेत आयोजना गरिएको थियो। साथै Digi School तथा SoftEd समूहसँग आबद्ध विभिन्न संस्थाहरूको सक्रिय सहभागिता देखिएको थियो।
यस प्रकारका पहलहरूले नेपालको शिक्षा प्रणालीलाई डिजिटल युगअनुसार रूपान्तरण गर्न सहयोग पुर्याउने तथा भविष्यका लागि सक्षम जनशक्ति उत्पादनमा महत्वपूर्ण योगदान दिने अपेक्षा गरिएको छ।