काठमाडौँ- गुणस्तर र पहुँचबीच सन्तुलन खोजिरहेको नेपाली स्वास्थ्य सेवा बजारमा एरो फार्मास्युटिकल्स प्रा.लि. ले दुवैलाई सँगै अघि बढाउन सकिने सन्देश दिएको छ। कम्पनीले आज काठमाडौँमा आफ्नो दोस्रो वार्षिक साधारणसभा (AGM) सम्पन्न गर्दै हालसम्मको प्रगति समीक्षा गर्नुका साथै सस्तो मूल्यमा गुणस्तरीय औषधि उत्पादन गर्ने प्रतिबद्धता पुनः दोहोर्याएको छ।
फार्मास्युटिकल क्षेत्रको व्यवस्थापन तथा सञ्चालनमा लामो अनुभव भएका तीन जना अनुभवी पेशेवरको संयुक्त पहलमा स्थापना भएको एरो फार्मास्युटिकल्स प्रभावकारी औषधि सबैको पहुँचमा हुनुपर्छ भन्ने साझा विश्वासका साथ अघि बढिरहेको कम्पनी हो। यही दर्शनबाट प्रेरित भई कम्पनीको नाम ‘एरो’ राखिएको हो, जसले स्वास्थ्य सेवामा सही दिशातर्फको स्पष्ट लक्ष्यलाई जनाउँछ।
कम्पनीको मुख्य आधार भक्तपुरमा अवस्थित आधुनिक उत्पादन केन्द्र हो, जुन ५१ हजार वर्गफुट क्षेत्रफलमा फैलिएको छ। अन्तर्राष्ट्रिय मापदण्डअनुसार डिजाइन गरिएको यो उद्योग दुई छुट्टाछुट्टै ब्लकमा सञ्चालन भइरहेको छ। एक ब्लकमा सामान्य औषधि उत्पादन हुने गरेको छ भने अर्को ब्लक विशेष रूपमा सेफालोस्पोरिन एन्टिबायोटिक उत्पादनका लागि निर्माण गरिएको छ, जसले उच्चस्तरीय सुरक्षा, नियन्त्रण र गुणस्तर सुनिश्चित गर्छ।
‘क्लिन रुम कन्सेप्ट’ मा आधारित यस उत्पादन केन्द्र अत्याधुनिक मेसिनरी र स्वचालित प्रविधिले सुसज्जित छ। हाल प्रचलित गुड म्यानुफ्याक्चरिङ प्राक्टिस (cGMP) अनुसार सञ्चालन हुने यस संरचनाले उत्पादनका सबै चरणमा गुणस्तर, शुद्धता र कार्यक्षमता कायम राख्न सहयोग पुर्याइरहेको कम्पनीको भनाइ छ।
उत्पादनसँगै एरो फार्मास्युटिकल्सले चिकित्सक समुदायसँगको नैतिक र जिम्मेवार सम्बन्धलाई पनि प्राथमिकतामा राखेको जनाएको छ। वैज्ञानिक तथ्यमा आधारित, जिम्मेवार प्रवर्द्धन गर्ने उद्देश्यले कम्पनीले दक्ष र प्रतिबद्ध बिक्री टोलीमा निरन्तर लगानी गर्दै आएको छ।
दोस्रो वार्षिक साधारणसभामा कम्पनीका उपलब्धि, सञ्चालन क्षमता तथा आगामी रणनीतिबारे विस्तृत छलफल गरिएको थियो। स्वदेशी औषधि उत्पादन राष्ट्रिय स्वास्थ्य सुरक्षाका लागि महत्वपूर्ण बन्दै गएको सन्दर्भमा एरो फार्मास्युटिकल्सले आफूलाई जिम्मेवार, मूल्य–आधारित नेपाली उत्पादनकर्ताका रूपमा स्थापित गर्ने लक्ष्य लिएको जनाएको छ।
स्पष्ट दृष्टिकोण, आधुनिक पूर्वाधार र मानव केन्द्रित कार्यशैलीका साथ एरो फार्मास्युटिकल्स लिमिटेडले नेपाली औषधि उद्योगलाई अझ पहुँचयोग्य, नैतिक र गुणस्तरमुखी दिशातर्फ अग्रसर गराउँदै लगेको देखिन्छ।