काठमाडौं । बुद्धभूमि नेपाल हाइड्रोपावर कम्पनी लिमिटेडले आफ्नो १७औं वार्षिक साधारणसभा सम्पन्न गरेको छ। कम्पनीका अध्यक्षले प्रस्तुत गरेको प्रतिवेदन अनुसार साधारणसभामा आयोजकले विगत आर्थिक वर्षका गतिविधि, उपलब्धि तथा आगामी योजना बारे विस्तृत जानकारी प्रस्तुत गरेका थिए।
अध्यक्षका अनुसार कम्पनीले गत वर्ष उत्पादन तथा वित्तीय व्यवस्थापनका क्षेत्रमा उल्लेख्य प्रगति हासिल गरेको छ। कम्पनीले निर्माण गरिरहेको नुवाकोट जिल्लास्थित तल्लो तारु जलविद्युत् आयोजना निरन्तर सञ्चालनमा रहेको र वार्षिक आम्दानीमा वृद्धि भएको प्रतिवेदनमा उल्लेख छ। उत्पादन अवरुद्ध हुने अवस्था न्यून भएपछि कम्पनीको आम्दानीमा सकारात्मक असर परेको जनाएको छ।
साधारणसभामा २०८१/८२ को वार्षिक प्रतिवेदन अनुमोदन, लेखा परीक्षण प्रतिवेदन पारित गर्ने, नयाँ लेखा परीक्षक नियुक्त गर्ने, सञ्चालक समिति सदस्यहरूको पारिश्रमिक तोक्ने लगायतका एजेन्डा बहुमतले पारित गरिएको छ। साथै, आगामी वर्षमा कम्पनीलाई थप सक्षम बनाउने योजनाबारे पनि जानकारी गराइएको थियो।
अध्यक्षले कम्पनीको प्रगतिको श्रेय सेयरधनी, कर्मचारी तथा स्थानीय समुदायको सहयोगलाई दिएका छन्। सरकारका सम्बन्धित निकाय—नेपाल विद्युत् प्राधिकरण, विद्युत् नियमन आयोग, ऊर्जा मन्त्रालय, जलस्रोत तथा सिँचाइ मन्त्रालय, स्थानीय तह र सरोकारवाला निकायहरुको निरन्तर सहयोग रहने विश्वास पनि व्यक्त गरिएको छ।
कम्पनीले भविष्यमा उत्पादन क्षमता विस्तार गर्ने, वित्तीय व्यवस्थापनलाई अझ मजबुत बनाउने तथा लगानीकर्ता हितलाई प्राथमिकता दिने योजना अघि सारेको छ।