शिक्षा तथा मानव स्रोत विकास केन्द्रबाट निम्न माध्यमिक तहको दरबन्दी विवरण आउने बितिकै तृतीय श्रेणीका शिक्षक छनोटका लागि शिक्षक सेवा आयोग विज्ञापन गर्ने तयारीमा रहेको छ ।
विज्ञापनका सम्पूर्ण काम सकेर तयारी अवस्थामा रहेको भए पनि केन्द्रबाट रिक्त दरबनदी विवरण सिफारिस नभएको हुँदा विज्ञापनका लागि कुर्नु परेको आयोगले जनाएको छ ।
केन्द्रले यस अघि सार्वजनिक गरेको विवरणमा निमाविको रिक्त दरबन्दी नेपालीमा ११३, अङ्ग्रेजीमा १६४, गणितमा १३८, गणित विज्ञानमा ४०, विज्ञानमा १६९, ऐच्छिक प्रथममा १ दरबन्दी गरी जम्मा ७४४ पद रिक्त रहेको विवरण सार्वजनिक गरेको थियो ।
केन्द्रले प्रत्येक दिन सेवा निवृत्त हुने शिक्षकको संख्या फरक पर्ने हुँदा रिक्त दरबन्दी विवरण संशोधन भएर आइरहेको हुँदा एक दुईदिन रिक्त दरबन्दी विवरण आयोगमा पठाउन ढिला भएको हो ।
केन्द्रले अबको ढिलोमा तीन दिन भित्र दरबन्दी विवरण सहित विज्ञापनका लागि सिफारिस गर्ने जनाएको छ ।
प्राविको रुजु सकियो
आयोगले गत असोज १३ गते लिएको प्राथमिक तह तृतीय श्रेणी शिक्षक छनोट परीक्षाको नतिजा माघ अन्तिम साता सार्वजनिक गर्ने गरी काम गरिरहेको छ । प्राविधिक कठिनाइ नभएमा माघ अन्तिम साता नतिजा सार्वजनिक गर्ने तयारीमा आयोग जुटेको छ ।
आयोगले प्राविको विषयगत परीक्षाको उत्तरपुस्तिका परीक्षण सकेर, सम्परीक्षण, डाटा इन्ट्री सकेर रुजु गरिसकेको आयोगले जानकारी दियो ।
आयोगले गत चैत ९ गते कुल ७ हजार ८८२ पदका लागि गरेको विज्ञापन गरेको थियो । सो विज्ञापन अनुसार लिइएको सामान्य परीक्षाको नतिजा गत असार १ गते सार्वजनिक गरेको थियो । सो नतिजाबाट १६ हजार ७०२ जना विषयगत लिखित परीक्षाका लागि छनोट भएका थिए ।
