काठमाडौं।नेपालमा नयाँ राइड–सेयरिङ प्लेटफर्म ‘लक्सगो’ (Luxego) एप सार्वजनिक गरिएको छ । स्वदेशमै विकास गरिएको उक्त एपले यात्रु, चालक तथा व्यवसायीहरूलाई सुरक्षित, पारदर्शी र प्रविधिमैत्री सेवा प्रदान गर्ने लक्ष्य राखेको छ ।
डाटा सुरक्षा र स्वदेशी प्रविधिमा प्राथमिकता
एप सार्वजनिक गर्दै कम्पनीले प्रयोगकर्ताको व्यक्तिगत विवरण तथा डाटा सुरक्षालाई उच्च प्राथमिकतामा राखिएको जनाएको छ । विदेशी प्लेटफर्ममा डाटा बाहिर जाने जोखिमलाई ध्यानमा राख्दै ‘लक्सगो’ ले नेपालमै सुरक्षित रूपमा डाटा व्यवस्थापन गर्ने दाबी गरेको छ ।
कम्पनीका अनुसार एपमा GPS तथा आधुनिक प्रविधिको प्रयोग गरी यात्रु र चालक दुवैलाई सुरक्षित र विश्वसनीय सेवा प्रदान गरिनेछ ।
चालक र प्रयोगकर्तालाई आकर्षक सुविधा
लक्सगो एपमार्फत प्रयोगकर्ताले सहज रूपमा सवारी बुक गर्न सक्नेछन् । Normal, Comfort र Premium Luxury जस्ता विभिन्न सेवाको विकल्प उपलब्ध गराइने कम्पनीले जनाएको छ ।
यस्तै, ग्राहकलाई छुट, विशेष अफर तथा लक्की ड्रमार्फत पुरस्कार जित्ने अवसरसमेत प्रदान गरिनेछ । उत्कृष्ट सेवा दिने चालकलाई मासिक रूपमा सम्मान तथा प्रोत्साहन गर्ने व्यवस्था गरिएको छ ।
सामाजिक उत्तरदायित्व र सहुलियत
एपले ज्येष्ठ नागरिक, अपाङ्गता भएका व्यक्ति लगायतका समूहलाई विशेष छुटको व्यवस्था गर्ने जनाएको छ । साथै चालक र व्यवसायीहरूको आम्दानी वृद्धि तथा रोजगारी सिर्जनामा योगदान पुर्याउने लक्ष्य राखिएको छ ।
कम्पनीले चालकहरूको सामाजिक सुरक्षामा समेत ध्यान दिँदै बीमा, आपतकालीन सहयोग तथा दुर्घटनामा आर्थिक सहयोग प्रदान गर्ने नीति अघि सारेको छ ।
आम्दानी र दीर्घकालीन सुरक्षा योजना
लक्सगोले चालकहरूको आम्दानीलाई व्यवस्थित बनाउन कमिसन प्रणाली पारदर्शी बनाउने जनाएको छ । साथै चालकहरूको भविष्य सुरक्षित गर्न ‘रिटायरमेन्ट तथा बचत कोष’ जस्ता योजनाहरू पनि ल्याइने उल्लेख गरिएको छ ।
डिजिटल अर्थतन्त्रमा योगदानको अपेक्षा
कम्पनीले स्वदेशी एपमार्फत नेपालको डिजिटल अर्थतन्त्रलाई मजबुत बनाउने, देशभित्रै लगानी र आम्दानीको चक्र सिर्जना गर्ने तथा बाह्य निर्भरता घटाउने लक्ष्य लिएको छ ।
लक्सगो एपको सुरुवातसँगै नेपालमा राइड–सेयरिङ क्षेत्रमा नयाँ प्रतिस्पर्धा थपिने र प्रयोगकर्ताले थप सुरक्षित, भरपर्दो तथा विकल्पयुक्त सेवा पाउने अपेक्षा गरिएको छ ।
सञ्चालक समिति
लक्सगो प्राइभेट लिमिटेडको सञ्चालक समितिमा पाण्डव राज अर्याल अध्यक्षका रूपमा रहेका छन् भने राजन कुमार सापकोटा प्रबन्ध निर्देशकका रूपमा कार्यरत छन् । यसैगरी, गोविन्द न्यौपाने, बद्री बस्नेत, राजु श्रेष्ठ र निरज श्रेष्ठ सञ्चालकका रूपमा रहेका छन् । बिमल श्रेष्ठले सञ्चालक तथा कानुनी सल्लाहकारको भूमिका निर्वाह गरिरहेका छन् । कम्पनीले अनुभवी तथा विविध क्षेत्रका व्यक्तित्वहरूको नेतृत्वमा आफ्नो सेवा विस्तार गर्ने लक्ष्य राखेको जनाएको छ ।