मकवानपुर जिल्लाको क्षेत्र नम्बर–१ मा चुनावी माहोल दिनप्रतिदिन तातिँदै गएको छ। ठूला तथा स्थापित दलहरू घरदैलो अभियान, सभा–सम्मेलन र प्रचारप्रसारमा तीव्र रूपमा सक्रिय देखिएका छन् भने नयाँ दलहरू आफ्ना एजेन्डा प्रभावकारी रूपमा मतदातासम्म पुर्याउने प्रयासमा जुटेका छन्। गाउँ–टोलदेखि बजार क्षेत्रसम्म राजनीतिक बहस चर्किँदै गएको छ।
यस क्षेत्रमा नेपाली कांग्रेसबाट महालक्ष्मी डिना उपाध्याय, नेकपा एमालेबाट रामेश्वर राना, नेपाल कम्युनिस्ट पार्टीबाट विजय गौतम, राष्ट्रिय प्रजातन्त्र पार्टीबाट दीपक बहादुर सिंह तथा राष्ट्रिय स्वतन्त्र पार्टीबाट प्रकाश गौतम उम्मेदवार बनेका छन्। त्यसैगरी प्रगतिशील लोकतान्त्रिक पार्टी (प्रलोपा)का तेजप्रसाद उप्रेती, श्रम संस्कृति पार्टी बाट विद्या श्रेष्ठ र उज्यालो नेपाल पार्टीबाट सुरेन्द्र लामा लगायतका उम्मेदवारहरू पनि चुनावी मैदानमा होमिएका छन्। बहुदलीय प्रतिस्पर्धाले यस क्षेत्रलाई थप रोमाञ्चक बनाएको छ।
फागुन २१ गतेको मतदान मिति नजिकिँदै जाँदा चुनावी गतिविधि झन् तीव्र बन्दै गएको छ। विशेषगरी विदेशमा रहेका नेपालीहरू मताधिकार प्रयोग गर्न स्वदेश फर्किन थालेपछि गाउँ–टोलमा उत्साह थपिएको छ। वैदेशिक रोजगारीमा रहेका युवादेखि विद्यार्थीहरूसम्म मतदानमा सहभागी हुन घर फर्कन थालेका छन्, जसले चुनावी वातावरणलाई थप जीवन्त बनाएको छ।
यसपटकको निर्वाचनलाई २०८४ सालको निर्धारित कार्यकालअघि नै सम्पन्न हुन लागेको चुनावका रूपमा पनि हेरिएको छ। ‘जेन–जी आन्दोलन’का रूपमा चर्चित युवा–केन्द्रित राजनीतिक सक्रियताले समकालीन राजनीतिमा प्रभाव पारेको चर्चा भइरहेका बेला समयअगावै चुनावी प्रक्रिया अघि बढ्नु चासोको विषय बनेको छ।
स्थापित दलहरूसँग संगठन, स्रोत–साधन र अनुभवी कार्यकर्ताको बलियो सञ्जाल हुनु स्वाभाविक हो। त्यसका कारण नयाँ दलहरूका लागि जनविश्वास निर्माण गर्नु चुनौतीपूर्ण देखिन्छ। राजनीतिक विरासत र संगठनात्मक अनुभवको अभावले नयाँ शक्तिलाई आफ्नो स्थान स्थापित गर्न समय लाग्ने संकेत देखिन्छ। तर लोकतन्त्रको सुन्दर पक्ष भनेको स्वस्थ प्रतिस्पर्धा र विकल्पको उपस्थिति नै हो।
यदि युवा पुस्ता र परिवर्तनको अपेक्षा राख्ने मतदाताको समर्थन प्राप्त भयो भने नयाँ राजनीतिक शक्तिहरूले पनि प्रभावकारी उपस्थिति जनाउन सक्छन्। पारदर्शिता, सुशासन, रोजगारी सिर्जना र स्थानीय विकासका एजेन्डालाई प्राथमिकतामा राख्न सके प्रतिस्पर्धा झन् रोचक बन्नेछ।
समग्रमा, मकवानपुर–१ मा कसले बाजी मार्नेछ भन्ने प्रश्नको उत्तर अन्ततः मतपेटिकाले नै दिनेछ। चुनाव नजिकिँदै जाँदा सरगर्मी झन् बढ्दो छ, र मतदाताको अन्तिम निर्णय नै निर्णायक सावित हुनेछ।