ललितपुर । नेपालमा पशु स्वास्थ्य सेवामा क्रियाशील कान्तिपुर फार्मास्युटिकल्स ल्याब लिमिटेड (केपीएल) ले आज आफ्नो दोस्रो वार्षिक साधारण सभा (AGM) सफलतापूर्वक सम्पन्न गरेको छ। सभाले देशको पशुपालन तथा पशु स्वास्थ्य सेवा सुदृढीकरणतर्फ कम्पनीको निरन्तर प्रतिबद्धतालाई पुनः पुष्टि गरेको छ।
वि.सं. २०७३ मा स्थापना भएको केपीएलले पशु स्वास्थ्य तथा उत्पादनशीलता अभिवृद्धि गर्ने लक्ष्यसहित पशु औषधि क्षेत्रमा आफूलाई एक उदाउँदो कम्पनीका रूपमा स्थापित गर्दै आएको छ। “Together For Livestock Health” भन्ने मूल नाराअनुसार कम्पनीले हालसम्म हासिल गरेको प्रगति, सञ्चालनगत उपलब्धि तथा आगामी रणनीतिक योजनाबारे साधारण सभामा विस्तृत समीक्षा गरिएको थियो।
सभामा कम्पनीले दुग्धजन्य गाईवस्तु, घोडा, कुखुरा, सुँगुर तथा घरपालुवा जनावरका लागि लक्षित फिड सप्लिमेन्ट, फिड न्यूट्रिसन प्रिमिक्स, फाइटोकेमिकल उत्पादन तथा एलोप्याथिक औषधिहरूको विस्तारित पोर्टफोलियोबारे जानकारी गराएको छ। यी उत्पादनहरू सुरक्षा, प्रभावकारिता र गुणस्तरमा ध्यान दिँदै पशु उत्पादनशीलता वृद्धि गर्ने उद्देश्यले विकास गरिएको कम्पनीले जनाएको छ।
केपीएल व्यवस्थापनले कम्पनीको वृद्धिमा दक्ष प्राविधिक तथा मार्केटिङ टोलीको महत्वपूर्ण भूमिका रहेको उल्लेख गर्दै देशभर फैलिएको प्रभावकारी वितरण सञ्जालमार्फत विशेष वितरक तथा आधिकारिक स्थानीय डिलरमार्फत समयमै पशु औषधि उपलब्ध गराइँदै आएको जानकारी दिएको छ। साथै, उत्पादनको गुणस्तर निरन्तर कायम राख्न पशु तथा औषधि क्षेत्रमा अनुभवी जनशक्ति आकर्षित गर्ने प्रतिबद्धता पनि दोहोर्याइएको छ।
आगामी योजनाबारे जानकारी दिँदै कम्पनीले अन्तर्राष्ट्रियस्तरका प्रमाणपत्रहरू प्राप्त गर्ने लक्ष्य लिएको जनाएको छ। यसअन्तर्गत गुणस्तर व्यवस्थापन प्रणालीका लागि ISO-9001, वातावरण व्यवस्थापन प्रणालीका लागि ISO-14001, फिड डिभिजनका लागि FAMI-QS तथा एलोप्याथिक डिभिजनका लागि WHO-GMP प्रमाणपत्र हासिल गर्ने तयारी अघि बढाइएको छ।
दीर्घकालीन दृष्टिकोण प्रस्तुत गर्दै केपीएलले राष्ट्रिय तथा अन्तर्राष्ट्रिय स्तरमा पशु औषधि उद्योगको अग्रणी कम्पनीका रूपमा स्थापित हुने आकांक्षा व्यक्त गरेको छ। किसान, इन्टिग्रेटर तथा पशु चिकित्सकहरूका लागि भरपर्दो र विश्वासिलो साझेदार बन्ने कम्पनीको मिशन रहेको जनाइएको छ।
खाद्य सुरक्षासँग प्रत्यक्ष रूपमा जोडिएको नेपालका पशुपालन तथा कुखुरा पालन क्षेत्रको दिगो विकासमा योगदान पुर्याउने लक्ष्यसहित केपीएलको दोस्रो वार्षिक साधारण सभाले नवप्रवर्तन, गुणस्तर र जिम्मेवार व्यवसायिक वृद्धिप्रतिको प्रतिबद्धता स्पष्ट रूपमा उजागर गरेको छ।