काठमाडौं, साउन १८ । पछिल्ला दिनमा नेपाली कांग्रेसको निर्णयले तामाङ समुदायका नेताहरू सत्ताबाट एकपछि अर्को गर्दै बाहिरिँदै आएका छन्। यसको ताजा उदाहरण बनेका छन् बागमती प्रदेशका मुख्यमन्त्री बहादुरसिंह लामा तामाङ, जो पार्टी नेतृत्वको निर्देशनपछि राजीनामा दिन तयार भएका छन्।
यसअघि कांग्रेस नेतृत्वको सरकारमा ऊर्जा राज्यमन्त्री रहेका कान्छाराम तामाङले पद त्याग गर्नुपरेको थियो। त्यसैगरी, नेपाल विद्युत प्राधिकरणका कार्यकारी निर्देशक कुलमान घिसिङलाई कार्यकालको अन्त्य नजिक पुग्दा हटाइएको थियो।
ऊर्जामन्त्री दीपक खड्काको पहलमा, प्रधानमन्त्री ओली र कांग्रेस सभापति शेरबहादुर देउवाबीचको परामर्शपछि घिसिङ हटाइएका थिए। ती सबै निर्णयमा कांग्रेस नेतृत्वको प्रभाव देखिएको छ।
अहिले तेस्रोपटक, बागमती प्रदेशका मुख्यमन्त्री लामा तामाङलाई पनि कांग्रेसले सत्ताबाट अलग गर्ने तयारी गरेको छ। सभापति देउवाले लामालाई बुढानीलकण्ठस्थित निवासमा बोलाएर मार्गप्रशस्त गर्न निर्देशन दिएका छन्। देउवाले लोकतान्त्रिक प्रक्रियाबाट आएको निर्णय स्वीकार गर्न सुझाव दिएका हुन्।
लामाले सभापतिको प्रस्तावलाई ‘स्वीकार्य’ भनेका छन्, तर राजीनामाअघि आफ्ना निकट नेताहरूसँग छलफल गर्ने मनस्थितिमा छन्। सत्ताबाट पछिल्ला तीन तामाङ नेताहरूको बाहिरिने क्रमले कांग्रेसभित्र जातीय सन्तुलनको प्रश्न उठ्न थालेको छ। विश्लेषकहरूका अनुसार, यो संयोग मात्र हो वा राजनीतिक रणनीति, त्यसको मूल्यांकन आगामी घटनाक्रमले नै गर्नेछ।