टुकुचा खोलाको ‘प्वाइन्ट’ पत्ता लगाउन जय नेपाल हलमा पुग्यो महानगरको डोजर
काठमाडौं महानगरपालिकाको डोजर टुकुचा खोलाको प्वाइन्ट पत्ता लगाउन जय नेपाल हलमा पुगेको छ ।लामो समयदेखि अतिक्रमणमा परेर गायब भएको टुकुचा खोलाको प्वाइन्ट पत्ता लगाउन सो क्षेत्रमा पुगेको महानगर प्रहरी प्रमुख एसपी राजुनाथ पाण्डेले बताए ।
“हामी मेन ‘प्वाइन्ट’ पत्ता लगाउने प्रयास गरिरहेका छौँ । भर्खर डोजरसहित जय नेपाल हलमा पुगेका छौँ,” उनले भने ।लामो समयदेखि अतिक्रमणमा परेका अवैध संरचना महानगरले भत्काउँदै आएको छ । अहिलेसम्म ३९ ठाउँका अवैध संरचनामा महानगरको डोजर चलिसकेको छ ।
नयाँ ब्रोकरलाई लाइसेन्स : एक–दुई दिनमै आवेदन आह्वान गरिने
नेपाल धितोपत्र बोर्डले धितोपत्र व्यवसायी (धितोपत्र दलाल तथा धितोपत्र व्यापारी) नियमावली, २०६४ को पाँचौँ संशोधन गर्दै नयाँ ब्रोकरलाई लाइसेन्स दिन बाटो खुला गरेको छ ।
चौथो संशोधनमा नियम ३ को उपनियम ५ अस्पष्ट थियो । बोर्डले उक्त नियमावली पुनः संशोधनका लागि मन्त्रिपरिषद्मा पठाएको थियो । सो नियमावली संशोधन भएर आएसँगै नयाँ ब्रोकरलाई लाइसेन्स दिने बाटो खुलेको हो ।
बोर्डले नयाँ ब्रोकरलाई लाइसेन्स दिनका लागि आवेदन आह्वानको तयारी गरेको छ । एक–दुई दिनभित्रै आवेदन आह्वान गरिने धितोपत्र बोर्डका अध्यक्ष रमेशकुमार हमालले जानकारी दिए ।
“बोर्डले नयाँ लाइसेन्सको आवेदन खुला गर्ने तयारी गरिरहेको छ । एक–दुई दिनमा नै यो आवेदन खुला हुनेछ । शुभकार्यमा ढिलाइ हुनु हुँदैन,” उनले भने, “नियमावलीअनुसार पहिलोपटकका लागि लाइसेन्स खुल्नेछ । यो वर्ष खुलेपछि अध्ययन गरेर तीन वर्षपछि आवश्यकता परे नयाँ ब्रोकर लाइसेन्स दिइनेछ ।”
चौथो संशोधनमा नियम ३ को उपनियम ५ मा ‘यो नियमावली प्रारम्भ भएको तीन वर्षपछि बोर्डले धितोपत्र बजारमा उपलब्ध भौतिक सुविधा, बजारको आवश्यकता, प्रतिस्पर्धाको अवस्था समेतको अध्ययन गरी धितोपत्र दलाल र धितोपत्र व्यापारीको लागि नयाँ अनुमतिपत्रको लागि निवेदन माग गर्नेछ’ भन्ने व्यवस्था थियो ।
उक्त नियम ३ को उपनियम ५ संशोधन गरेर ‘यो नियमावली प्रारम्भ भएपछि पहिलोपटक धितोपत्र दलाल र धितोपत्र व्यापारीको अनुमतिपत्र जारी भएपछिको प्रत्येक तीन वर्षमा बोर्डले धितोपत्र बजारमा उपलब्ध भौतिक सुविधा, बजारको आवश्यकता, प्रतिस्पर्धाको अवस्था समेतको अध्ययन गरी धितोपत्र दलाल र धितोपत्र व्यापारीको लागि नयाँ अनुमतिपत्रको लागि निवेदन माग गर्नेछ’ भन्ने व्यवस्था समावेश गरिएको छ ।
यो नियमावली प्रारम्भ भएको वर्ष पहिलोपट ब्रोकर लाइसेन्स दिने र त्यसपश्चात् तीन वर्षपछि आवश्यकता हेरेर मात्र लाइसेन्स दिने व्यवस्था गरिएको छ । चौथो संशोधनमा नियमावली प्रारम्भ भएको तीन वर्षपछि नयाँ ब्रोकर लाइसेन्स दिने उल्लेख थियो । सो वाक्यलाई संशोधन गरेर नियमावली प्ररम्भ भएपछि पहिलोपटक र त्यसको तीन वर्षपछि लाइसेन्स दिन पाउने व्यवस्था गरिएको छ ।
यस्तै, नियमावलीको पाँचौँ संशोधनमा बोर्डले अर्थ मन्त्रालयको स्वीकृति लिई आवश्यकताअनुसार अनुसूचीमा हेरफेर वा थपघट गर्न पाउने व्यवस्था गरिएको छ । यसअघि, अनुसूची संशोधन गर्न पनि मन्त्रिपरिषद्को स्वीकृति लिनुपर्ने व्यवस्था थियो ।