भोजपुरका किसानका लागि बाँदर हाल प्रमुख समस्या बनेका छन्। वर्षभरि मेहनत गरेर उत्पादन गरेको अन्नपात बाँदरले केही क्षणमै नष्ट गर्ने भएपछि किसान हैरान भएका छन्। मकै पाक्ने तथा धान रोप्ने मौसममा बाँदर खेतबारीमा पसेर बाली सखाप पार्ने क्रम बढेको छ।
बास्तिम, दलगाउँ, मानेभञ्याङ, खावा, कोट, गोगने, लेखर्क, बोखिम, धोद्लेखानीलगायत नौवटै स्थानीय तहमा किसान पीडित छन्। बस्ती खाली भएपछि माथिल्लो भेगसम्म बाँदर पुग्ने गरेका छन्।
स्थानीयवासीको भनाइअनुसार, बाँदरको समस्या बढ्दै गए बस्ती नै खाली हुने अवस्था आउँछ। खेतबारीको सुरक्षा गर्न किसानले टहरा बनाएर पालोपालो हेरचाह गर्नुपरेको छ। यन्त्रउपकरण पड्काएर तर्साउने उपाय पनि हाल प्रभावकारी नभएको किसानको गुनासो छ।
प्रकाशित मिति : २०८२ साउन २८ गते मङ्गलवार