साउदी अरबले हज र उमराहमा आउने महिलाका लागि ठूलो निर्णय गर्यो
काठमाडौं । साउदी अरबले हज र उमराहमा जाने महिलाका लागि ठूलो निर्णय गरेको छ । तीर्थयात्रामा जाने महिलाले अब कुनै पनि पुरुषलाई साथमा ल्याउनु नपर्ने भएको छ ।
इजिप्टको राजधानी कायरोस्थित साउदी दूतावासमा आयोजित पत्रकार सम्मेलनमा साउदी अरेबियाका हज तथा उमराह मन्त्री तौफिक अल-राबियाले उक्त निर्णयको घोषणा गरेका हुन् ।
उनले हज र उमराहका लागि आउने महिलालाई अब कुनै महरम (रगतको नाता भएका पुरुष) बिना आउन दिइने बताए । यससँगै महिलाहरु हज र उमराहमा एक्लै आउन सक्छन् कि सक्दैनन् भन्ने बहसको अन्त्य भएको छ ।
गत वर्ष पनि महरम बिना आउन अनुमति दिइएको थियो, तर त्यसपछि महिला अन्य महिलासँग आउन सक्थे। तर, यो वर्ष आएको आदेशमा महिलाहरु एक्लै पनि तीर्थयात्रामा आउन सक्नेछन् ।
साउदी अरेबियाको अंग्रेजी अखबार साउदी गजेटका अनुसार अल-राबियाले मुस्लिम कुनै पनि प्रकारको भिसा लिएर उमराहका लागि साउदी अरब आउन सक्ने बताए। उमरा भिसाको लागि कुनै कोटा वा संख्या सीमा छैन।