सबै मिलेर आए हुन्छ, एमाले एक्लै चुनाव लड्छ – ओली



काठमाडौं | प्रधानमन्त्री केपी शर्मा ओलीले अबको चुनावमा नेकपा एमाले एक्लै चुनाव लड्ने बताउनुभएको छ । माओवादी केन्द्रका अध्यक्ष पुष्पकमल दाहालले सबै पार्टी मिलेर एमालेविरुद्ध चुनाव लड्ने बताएको दुई दिनपछि प्रधानमन्त्रीको प्रतिक्रिया आएको हो ।

काठमाडौंमा सोमबार भएको कार्यक्रममा एमाले अध्यक्षसमेत रहनुभएका प्रधानमन्त्रीले भन्नुभयो, ‘प्रचण्डजीले कहिले कहिले साँचो कुरा गर्नुहुन्छ, एक्लै त कसैले नचिताए हुन्छ । नचिहाए पनि हुन्छ । एमाले एक्लै चुनाव लड्छ । देशभरीका जनता एकजुट होऔं, देशभरीका प्रतिक्रियावादीहरु पनि एकजुट भएर आऊ ।’

प्रधानमन्त्री ओलीले एमाले जालझेल, तिकडम गरेर सरकारमा नगएको स्मरण गराउनुभयो । ‘पहिलोपटक सरकारबाट हटाउँदा मैले भनेको थिएँ कि, हामी जस्केलाबाट होइन, राजमार्गबाट आउँछौं, फेरि पनि भन्छु एमाले जालझेल गरेर सरकारमा आएको होइन,’ उहाँले भन्नुभयो ।

प्रधानमन्त्री ओलीले सभामुखले संविधान र कानुनविपरीत काम गरेको जिकिर गर्नुभयो । अधिवेशनको पहिलो दिनमै पेस गर्नुपर्ने अध्यादेश सभामुखले रोकेकोमा असन्तुष्टि जनाउँदै प्रधानमन्त्रीले एमसीसी सम्झौता निर्णायार्थ पेस नगरेर कानुन मिचेको उल्लेख गर्नुभयो । उहाँले भन्नुभयो, ‘संविधानको, कानुनको मतलब छैन । कांग्रेस किन बोल्दैन ? मुखमा पानी हालेर बसेको छ ।’

प्रधानमन्त्री एवं एमाले अध्यक्ष केपी शर्मा ओलीले जनता र पार्टी विरुद्धका गतिविधि सहन नसकिने बताउनु भएको छ । उत्पीडित जातीय मुक्ति समाजको भेलालाई सोमबार काठमाडौंमा सम्बोधन गर्दै प्रधानमन्त्री ओलीले जनता र पार्टीविरुद्ध नलाग्न माधव गुटलाई चेतावनी दिनुभयो । प्रधानमन्त्री ओलीले भन्नुभयो – ‘सहने पनि एउटा हद हुन्छ, मविरुद्ध जे–जे गर्नुस्, तर पार्टी र जनताविरुद्ध ज्यादती गरेको म सहन्नँ ।’

जनता र पार्टीविरुद्धका गतिविधि रोकेर पार्टीमा फर्कन उहाँले माधव नेपाललाई आग्रह गर्नुभयो । पार्टीमा बसेर आफूलाई जति कटाक्ष गरेपनि फरक नपर्ने तर पार्टी विरोधी गतिविधि गरे माधवलाई ठीक पार्ने पनि प्रधानमन्त्री ओलीले बताउनुभयो । उहाँले भन्नुभयो – ‘अहिले पनि माधवजी पार्टी विरोधी काम गर्दै हुनुहुन्छ, म यसको सीमा हेरिरहेको छु ।’ माधव लगायत चार नेतालाई पार्टी हित विपरित काम गरेको भन्दै एमालेले ६ महिनाका लागि निलम्बन गरेको छ ।

माधव नेपालले गल्ती स्वीकारेर आए अझै पनि पार्टीमा ठाँउ भएको प्रधानमन्त्री ओलीले बताउनुभयो । उहाँले भन्नुभयो– ‘आफ्नै पार्टी सम्झेर आउनुस्, गल्ती स्वीकारेर आउनुस,पूरै जिम्मेवारी दिन्छौं, पार्टी फुटाएर गएको चोइटोलाई पार्टी स्वीकार गर्न सकिन्न ।’ प्रधानमन्त्री ओलीले आत्मालोचना गरेर पार्टीमा फर्किन माधव नेपाललाई आग्रह गर्नुभयो । आजसम्म गरेका पार्टी विरोधी अपराधहरुको आत्मआलोचना गरे मात्र माधवलाई पार्टीमा स्वागत गरिने समेत प्रधानमन्त्री ओलीले बताउनुभयो । उहाँले भन्नुभयो – ‘माधवजी पार्टीमा आए हामी स्वागत गर्छौं, तर पार्टीलाई ध्वस्त गर्ने काम भने गर्न पाईंदैन, गुटबन्दी गर्न पाईंदैन,

प्रधानमन्त्री ओलीले पार्टीका निलम्बित नेता माधवले आफूलाई सहयोग गर्नेलाई टिकट दिने आश्वासन दिएको पनि सुनाउनुभयो । प्रधानमन्त्री ओलीले भन्नुभयो – ‘केपी ओलीले टिकट दिएन भने म दिन्छु रे, टिकट त बसपार्कमा ड्राइभरले पनि दिन्छ ।’

प्रकाशित मिति : २०७७ चैत्र ३० गते सोमवार