माधव समूहबाट कृष्णभक्त पोखरेलको विद्रोह, भने- गल्ती भए माफ पाउँ



काठमाडौं । वरिष्ठ नेता माधवकुमार समूहका सांसद कृष्णभक्त पोखरेल अध्यक्ष केपी शर्मा ओली समूहमा लागेका छन् । ओलीले बोलाएको बैठकमा नजाने नेपाल समूहको निर्णय विपरित पोखरेल बालुवाटार पुगेका थिए ।

दलका नेताले बोलाएको बैठकमा जानुपर्ने अडान लिँदै आएका पोखरेल आज बालुवाटार बैठकमा गएका हुन् । पोखरेलले अब प्रधानमन्त्री ओलीलाई साथ दिने पनि प्रतिबद्धता जनाए । दलको बैठकमा बोल्दै पोखरेलले भने, ‘छुट्टै दलको बैठक या संसदीय दलको बैठक बस्नुपर्ने कुरा सकियो । अब मूलधारको एमालेमा लागें, कहीकतै गल्ती भए माफी पाउँ ।’

पोखरेलले यो सरकारले पाँच वर्ष काम गर्नुपर्ने पनि बताए । ‘बेलायतमा पनि जोन मेजरलाई घेराबन्दी गरेर हटाउन खोजियो । तर, सबैले पछि उहाँलाई साथ दिएर अगाडि बढे र पाँच वर्ष सरकार चल्यो’, उनले भने । ‘समृद्ध नेपाल, सुखी नेपाली’ ले बनाउने ओलीको अभियानलाई साथ दिने पनि पोखरेलले प्रतिबद्धता जनाए । अदालतको फैसलापछि आफू खुसी भएको उनको भनाइ थियो ।

नेपाल समूहका नेताहरुलाई स्पष्टीकरण सोध्ने संसदीय दलको निर्णय
काठमाडौं । नेकपा एमाले संसदीय दलले गुटगत भेला गर्नेहरुलाई स्पष्टीकरण सोध्ने निर्णय गरेको छ । प्रधानमन्त्री निवास बालुवाटारमा शनिबार बसेको दलको बैठकले संसदीय बोर्डमार्फत स्पष्टीकरण सोध्ने प्रक्रिया अगाडि बढाउने निर्णय गरेको प्रमुख सचेतक विशाल भट्टराईले जानकारी दिए ।

वरिष्ठ नेता माधवकुमार नेपाल समूहले चैत ४ र ५ गते राष्ट्रिय कार्यकर्ता भेला गरेको थियो । यो समूहमा आबद्ध सांसदहरु संसदीय दलको बैठकमा पनि गएनन् । ३८ सांसदको तर्फबाट ज्ञापनपत्र बुझाउन पुगेका तीन सांसदलाई दलका नेता केपी शर्मा ओलीले व्यक्तिगत धारणा सुन्ने तर गुटको प्रस्ताव स्वीकार नगर्ने बताएका थिए । संसदीय दलको बैठकमा पार्टी अध्यक्ष एवं दलका नेता ओलीले आफ्नो निर्देशन विपरित भेला गरेको भन्दै अगुवाहरुलाई स्पष्टीकरण सोधिने बताए । ‘आत्मालोचना गरेर आए सोच्न सकिनेछ नत्र कारबाहीको प्रक्रिया अगाडि बढाइनेछ’ उनले भने ।

प्रतिक्रियावादी तत्वसँग साँठगाँठ गरेर गुटगत भेला गरेको र झुटा लान्छनाहरु लगाएर पार्टी सरकारलाई बद्नाम गर्न खोजेको भन्दै उनले आक्रोश पोखेका छन् ।
सर्वोच्च अदालतको आदेशपछि आफूले वरिष्ठ नेता माधवकुमार नेपाललाई भेटेको तर उनले रियलाइजेसन नगरेको भन्दै उनले भने, ‘गुटगत गतिविधि गरेर हामीलाई बदनाम गराउन खोजिँदैछ । अब स्पष्टीकरणको प्रक्रिया अगाडि बढ्छ ।’

प्रकाशित मिति : २०७७ चैत्र ७ गते शनिवार