काठमाडौं । नेकपा एमालेका वरिष्ठ नेताद्वय झलनाथ खनाल र माधवकुमार नेपाल समूहको राष्ट्रिय कार्यकर्ता भेलामा कम्युनिस्ट आन्दोलनका अग्रज नेताहरुको सहभागिता रहेको छ । खनाल–नेपाल पक्षको राष्ट्रिय कार्यकर्ता भेलामा कम्युनिस्ट आन्दोलनका अग्रज तथा एमालेका पुराना नेताहरु कमल कोइराला, मोहनचन्द्र अधिकार, केशवाणि पोखरेल, राधाकृष्ण मैनाली, सिद्धिलाल सिंह, अमृत लाल बोहोरालगायतको सहभागिता रहेको छ ।
खनाल–नेपाल पक्षको कार्यकर्ता भेला आजबाट ललितपुरको सानेपामा सुरु भएको छ । भेलामा नेता कार्यकर्ताको उल्लेख सहभागिता रहेको छ । एमालेमा अध्यक्ष केपी ओली र खनाल–नेपाल पक्ष बीचको विवाद उत्कर्षमा छ । ओलीको एकलौटी निर्णयपछि खनाल–नेपाल पक्षले समानान्तर गतिविधि अगाडि बढाएको छ । ओली पक्षले कार्यकर्ता भेलामा सहभागी हुनेलाई कारबाहीको चेतावनी दिएपनि एमालेका संस्थापक नेता मध्येका केही नेता र कार्यकर्ता भेलामा सहभागी भएको पाइएको छ ।
एमाले भेला : कार्यपत्रमाथि १० समूहमा छलफल
एमालेको माधव नेपाल–झलनाथ खनाल पक्षको राष्ट्रिय कार्यकर्ता भेलामा पेश भएको ८ पेजको कार्यपत्रमाथि समूहगत छलफल हुने भएको छ । समूह विभाजन अनुसार प्रदेश १, जनवर्गीय संगठन र पेशागत संगठनहरु, कर्णाली प्रदेश, पूर्व सांसदहरु–पूर्वकेन्द्रीय सदस्यहरु–केन्द्रीय निकाय तथा विभागहरु,वागमती प्रदेश, प्रदेश २, गण्डकी, लुम्बिनी र सुदूरपश्चिम गरी छुट्टयाइएको छ ।
बिहीबार सुरु भएको भेलामा नेता माधवकुमार नेपालले ८ पेज लामो कार्यपत्र पेश गरेका थिए । ‘नेकपा एमालेको एकता बचाऔँ, कम्युनिष्ट आन्दोलनको रक्षा गरौँ’ भन्ने प्रस्तावमा पार्टी अध्यक्ष केपी शर्मा ओली एमाले विभाजन गर्न अग्रसर भएकाले पार्टीको एकता बचाउन राष्ट्रिय कार्यकर्ता भेला गर्नु परेको जनाइएको छ ।