एसिया कप क्रिकेटको उद्घाटन खेलमा आयोजक पाकिस्तानले नेपाललाई दुई सय ३८ रनले हराएको छ । यो खेल अघि मुल्तान क्रिकेट स्टेडियममा उद्घाटन कार्यक्रम आयोजना भएको थियो जसमा गायिका त्रिशाला गुरुङले प्रस्तुति दिइन् । प्रस्तुति पछि उनको आवाज र सुन्दरताको भारतीय मिडियामा व्यापक चर्चा छ । उद्घाटन कार्यक्रम सकिने बित्तिकै सोसल मिडियामा त्रिशाला ट्रेन्ड हुन थालिन् र उनीबारे जान्न भारतीय उत्सुक भए ।
त्रिशालाले आफ्नो प्रस्तुतिका बेला लगाएको पहिरनको पनि विशेष चर्चा छ । उनले सेतो साडी र रातो चुरा लगाएकी थिइन् । मानिसलाई उनको यो शैली निकै मनपर्यो । धेरैले उनको सादगीको पनि तारिफ गरिरहेका छन् ।
त्रिशालाको तारिफ गर्दै भारतीय सञ्चार माध्यमले उनलाई ‘ब्युटी विथ ब्रेन’ बताएको छ । साथै, उनको विवाह भइसकेको र उनका श्रीमान् रोहित शाक्यलाई नेपालको साङ्गीतिक क्षेत्रका ठुला व्यक्ति हुन् भनेर वर्णन गरिएको छ ।