गगनलाई ओलीको जवाफ : बाबु, भ्याकुम लगाएर एमाले सिध्याउने सपना नदेख



काठमाडौं । एमाले अध्यक्ष केपी शर्मा ओलीले कसैले चाहँदैमा एमाले पार्टी सिध्याउन नसक्ने बताएका छन् । कांग्रेसका युवा नेता गगन थापालाई लक्ष्यित गर्दै उनले भ्याकुम लगाएर एमाले बढार्ने सपना नदेख्न आग्रह गरे ।

केही दिन अघि थापाले भक्तपुरमा भाषण गर्दै एमालेलाई चुनावमा भक्तपुरबाट क्लीन स्वीप गर्ने बताएका थिए । कतै कुनाकाप्ची बाँकी रहेमा ‘भ्याकुम’ लगाएर बढार्नेसमेत उनको दावी थियो । ओलीले भक्तपुरमै पुगेर गगनलाई जवाफ दिएका हुन् ।

एउटा पुस्तक बिमोचन कार्यक्रममा बोल्दै ओलीले भने, ‘हिजो हो कि कहिले, एकजना बाबु घुम्दै यतै भक्तपुर आएछन् । भ्याकुम क्लिनर लिएर आएका । अनि, भ्याकुम क्लीनर लगाएर एमाले सिध्याउने रे । बिचरा । सिंगै कांग्रेस कहाँ पुग्यो हेक्का छैन, एमाले भ्याकुम क्लिनरले सिध्याउने सपना तिनीहरुका ।’

ओलीले माओवादी अध्यक्ष प्रचण्डले आफूलाई गणतन्त्रको विरोधी भनि गरेको टिप्पणीको पनि ओलीले जवाफ दिए । उनले भने, ‘प्रचण्डले गणतन्त्र भन्नुभन्दा २५ वर्षअगाडि नै हामीले गणतन्त्रको अभियान थालेका थियौं । २२ वर्षअगाडि नै गणतन्त्रको आन्दोलनमा जेल परेको थिएँ । कसैले धाक नदेखाए हुन्छ ।’

प्रकाशित मिति : २०७८ कार्तिक १८ गते बिहिवार