ओलीसँगै एमाले पनि सकिन्छ : माधव नेपाल



काठमाडौं । नेकपा(एकीकृत समाजवादी) पार्टीका अध्यक्ष माधवकुमार नेपालले केपी ओलीसँगै एमाले पनि सकिने दाबी गरेका छन् । पार्टी कामको सिलसिलामा पोखरा पुगेका अध्यक्ष नेपालले नेपाल पत्रकार महासंघ गण्डकी प्रदेश समितिले आयोजना गरेको पत्रकार भेटघाट कार्यक्रममा बोल्दै एमाले छाड्नेहरूको भविष्य सुरक्षित रहने पनि बताए। एमालेमा बस्नेहरूको भविष्य नभएको भन्दै उनले अब एमालेलाई टर्च बालेर खोज्नुपर्ने स्थिति आउने बताए ।

आफ्नो समूह छाडेर एमालेमा बस्ने नेताहरूको हरिबिजोग हुने बताएका छन् । एमालेमा कुनै नीति र विधि नभएको उल्लेख गर्दै उनले त्यहाँ रहनेहरू निजी कम्पनीको सदस्यका रूपमा रहने जिकिर गरे। केपी ओलीप्रति बफादार नहुनेहरूको हरिबिजोग हुने उनको तर्क छ ।

उनले भने, ‘मैले पटक–पटक भनेको थिएँ, बालुवा पेलेर तेल निस्कनेवाला छैन । आज सुधारौँला भनेर गएका साथीहरूको हरिबिजोग भइरहेको छ। देखिरहनुभएको छ । उहाँको(ओली) आफ्नै नीति र विधि छ। त्यसमा बसेका मान्छे उहाँको निजी कम्पनीका सदस्यका रूपमा रहन बाध्य हुनेछन् । त्यो कुनै सामूहिकताको सिद्धान्तबाट चल्दैन। त्यसले कमिटी प्रणालीलाई पालना गर्नेछैन । त्यहाँ केपी ओलीप्रति बफादार हुनेसँग बस्न पाइन्छ। बफादार भएन भने उसको हरिबिजोग हुनेछ ।’

प्रकाशित मिति : २०७८ कार्तिक १२ गते शुक्रवार